Xyoo 2025 Cov Hauj Lwm Vision Zero Kev Nyab Xeeb Rau Kev thiab Kev Tswj Ceev
posted
Txij xyoo 2020, Vision Zero Madison tau siv cov haujlwm txhim kho kev nyab xeeb thiab cov haujlwm tswj ceev tsheb txhua xyoo los txhawb kom kev mus los muaj kev nyab xeeb ntxiv rau hauv Lub Nroog cov kev. Cov hauj lwm no tsom ntsoov rau cov kev ntsuas pov hwm kev nyab xeeb uas tau pom zoo lawm xws li cov kab hla kev uas pom kev deb, cov cim ntsuab rau txoj kev tsheb kauj vab, cov teeb ci ntsa ntsais nrawm, thiab ua kom cov teeb liab pom tseeb dua, nrog rau kev txo cov kev txwv ceev thoob plaws hauv nroog hauv cov cheeb tsam uas muaj neeg raug mob ntau.
“Qhov tseem ceeb ntawm Vision Zero yog muab kev nyab xeeb los ua qhov xub thawj rau txhua tus neeg uas siv txoj kev, txawm lawv mus los licas los xij. Txawm koj tsav tsheb, taug kev, caij tsheb kauj vab, dov, los yog caij tsheb thauj neeg, txhua tus neeg muaj cai taug kev nyab xeeb thoob plaws peb Lub Nroog.” Tus Tswv Nroog Satya Rhodes-Conway hais. “Lub hom phiaj Vision Zero yog mob siab txhim kho peb txoj kev thiab tiv thaiv kev sib tsoo hnyav thiab tuag. Txawm hais tias ib qho hauj lwm yuav yog ib qho me xwb los, thaum muab los sib sau ua ke, nws yuav tsim tau ib qho txiaj ntsig loj thiab ua rau peb lub nroog muaj kev nyab xeeb dua.”
Qee qhov piv txwv ntawm kev txhim kho kev nyab xeeb ntawm Lub Zeem Muag Ntxaiv (Vision Zero) uas tab tom tsim los sis twb tau tsim tiav suav nrog:
Kev Tsim Kho Txoj Kev John Nolen Drive Dua Tshiab (2025-2029)
Lub Hauj Lwm Tsim Kho Txoj Kev John Nolen Drive Dua Tshiab yuav suav nrog ntau yam kev txhim kho rau txoj kev raws txoj kev txuas ntawm E Olin Avenue thiab S Broom Street.
Theem Ib ntawm lub hauj lwm no suav nrog ntu kev txij ntawm E Lakeside Street mus txog S Broom Street, thiab twb tau raug xaiv kom tau txais nyiaj pab lawm thiab xav tias yuav pib tsim kho rau xyoo 2025-2026. Theem Ob suav nrog ntu kev txij ntawm E Olin Avenue mus txog E Lakeside Street, thiab yuav raug tsim qauv thiab tsim kho kom tiav thaum muaj nyiaj pab lawm.
Theem Ib (ntu kev txij ntawm E Lakeside St mus txog S Broom St) yuav suav nrog cov kev txhim kho li nram no:
- Tsim kho rau (6) lub choj raws txoj kev txuas dua tshiab, nrog rau 3 lub choj tshiab uas cais tawm rau cov tsheb kauj vab thiab neeg mus kev.
- Kev hloov pauv ntawm txoj kev kab thiab kev faib ib nrab kom ua txoj kev loj zuj zus thiab pab kom tsheb khiav kom qeeb zuj zus.
- Kev nthuav dav txoj kev uas twb muaj lawm kom cais txoj kev tsheb kauj vab thiab txoj kev taug ko taw
- Kev Tsim Kho Ntug Pas Dej Monona Dua Tshiab
- Kev Tsim Kho Cov Qhov Dej Nag Dua Tshiab
- Cov Teeb Liab Teeb Ntsuab thiab Cov Teeb Kev Tsheb
- Txhim kho cov kev sib tshuam ntawm North Shore Dr thiab S Broom St
- Kev sib koom tes nrog cov kev txhim kho yav tom ntej uas yuav muaj, uas tau teev tseg rau hauv Lub Phiaj Xwm Loj rau Ntug Dej Lake Monona (Lake Monona Waterfront Master Plan).
Txoj Kev Autumn Ridge Path
Txoj Kev Autumn Ridge Path yog ib lub hauj lwm uas ua rau neeg zoo siab tos ntsoov, uas siv sij hawm ntau xyoo los npaj thiab tsim. Lub hauj lwm no tau tsim ib txoj kev txuas rau sawv daws siv ua ke ntawm Milwaukee Ave thiab Commercial Ave (nyob sab qaum teb ntawm Highway 30), suav nrog ib lub choj hla tshiab uas hla dhau Highway 30. Lub hauj lwm no txhim kho kev nyab xeeb thiab kev yooj yim rau cov kev mus los uas tsis siv cav tsheb kom hla tau Highway 30, uas ua rau cov zej zog nyob ob sab txoj kev loj sib txuas tau zoo dua. Txoj Kev Autumn Ridge Path txhawb nqa cov kev tsheb kauj vab hauv cheeb tsam no kom loj dua, vim tias txoj kev no txuas (siv cov kev hauv zos) mus rau lub choj hla uas twb muaj lawm saum Txoj Kev Stoughton Rd (Txoj Kev Loj 51) ntawm Portland Pkwy, mus hla hauv lub zej zog Eastmorland mus txog Garver Pathnyuam qhuav tsim tas, thiab thaum kawg mus txog Txoj Kev Capital City Trail thiab cheeb tsam hauv plawv nroog Madison.
Kev Tsim Kho Txoj Kev Rutledge Dua Tshiab
Lub hauj lwm kho dua tshiab no tab tom ua thiab suav nrog ntau yam kev txhim kho kev nyab xeeb rau txhua tus neeg siv txoj kev, thiab suav nrog:
- · Kev tsim kho ntawm txoj kev taug kev ntawm Walton Place thiab North Russell Street kev sib tshuam sab qaum teb tau raug tshem tawm kom nqaim txoj kev kom txo cov neeg taug kev hla kev deb thiab txo tsheb ceev.
- · Txhim kho cov kab cim thiab kho qib kev ntawm txhua qhov kev sib tshuam kom pab tau txhua tus neeg mus kev hla kev nyab xeeb.
- · Kev nres tsheb ntawm ob sab kev yuav ua kom txoj kev tsheb nqaim zog thiaj li pab kom tsheb khiav qeeb.
Cov Ntsiab Lus Tseem Ceeb ntawm Cov Hauj Lwm Safe Streets Madison rau Xyoo 2025
Txog tam sim no xyoo no, Pawg Neeg Saib Xyuas Kev Thauj Mus Los tau pom zoo tag nrho nees nkaum xya (27) lub hauj lwm lawm. Cov hauj lwm no yuav ua rau peb cov kev muaj kev nyab xeeb dua los ntawm kev ntxiv cov kev ntsuas pov hwm kev nyab xeeb uas tau pom zoo lawm, xws li cov kab kev rau tsheb kauj vab, cov teeb liab plaub fab ntsa ntsais nrawm (rectangular rapid flashing beacons, RRFBs), kev txhim kho kev nyab xeeb rau cov teeb liab tsheb, thiab lwm yam kev txhim kho rau neeg mus kev thiab tsheb kauj vab.
Cov piv txwv ntawm cov hauj lwm no suav nrog:
- Cov kab kev tsheb kauj vab thiab cov cim ntsuab tshiab
- Txoj kab kev tsheb kauj vab ntawm Broom Street uas muaj tsheb nres tiv thaiv
- Kev npaj Thierer Road dua tshiab
- Kev txhim kho cov theem teeb liab ntawm ntau qhov chaw thoob plaws hauv nroog
- Cov teeb liab plaub fab ntsa ntsais nrawm ntawm cov kev sib tshuam li nram no:
- Txoj Kev Wright St-Straubel St
- Txoj Kev Whitney Way-Russett Rd
- Txoj Kev Monroe St-Randall Ave
- Txoj Kev Maple Grove Dr-Keswick Ct
Pib txij lub caij ntuj sov no, Lub Nroog yuav txuas ntxiv txoj hauj lwm txo cov kev txwv ceev kom muaj kev nyab xeeb ntxiv rau ntawm cov kev li nram no:
- Txoj Kev Old Sauk Rd (txij ntawm Beltline mus txog N Pleasant View Rd, txo qhov ceev ntawm 35 mus rau 30 mph)
- Txoj Kev Raymond Rd (txij ntawm McKenna Blvd mus txog S High Point Rd, txo qhov ceev ntawm 35 mus rau 30 mph)
- Txoj Kev Eastpark Blvd (txij ntawm Portage Rd mus txog American Pkwy, txo qhov ceev ntawm 35 mus rau 30 mph)
- Txoj Kev W Washington Ave (txij ntawm Park St mus txog Regent St, txo qhov ceev ntawm 30 mus rau 25 mph)
“Peb xav ua tsaug rau peb cov pej xeem thiab cov thawj coj hauv nroog rau kev txhawb nqa thiab kev sib koom tes los ua kom peb txoj kev muaj kev nyab xeeb dua," Yang Tao, Tus Thawj Coj ntawm Lub Nroog Saib Xyuas Kev Tsheb Khiav Hauj Lwm (Traffic Engineering Division) hais. “Yuav kom txoj kev muaj kev nyab xeeb dua, Madison yuav tsum txuas ntxiv txhim kho kev taug ko taw thiab caij tsheb kauj vab thiab kev mus los yooj yim rau lwm txoj kev thauj mus los thoob plaws hauv zej zog. Txhua tus yuav tau txoj kev muaj kev nyab xeeb dua rau mus ua hauj lwm, mus kawm ntawv thiab ua si lom zem hauv peb lub nroog.”
Vision Zero yog ib qhov kev koom tes hauv zej zog thiab thoob plaws lub nroog. Yuav kom tsis muaj neeg tuag thiab raug mob hnyav li lawm ntawm peb cov kev, peb yuav tsum tsim kom muaj ib txoj kev coj noj coj ua ntawm kev tsav tsheb kom muaj kev nyab xeeb. Peb yuav tsum tsim qauv peb cov kev tsheb thiab kev ceev kom thev tau tib neeg txoj kev ua yuam kev, tab sis kuj yuav tsum tsom ntsoov rau kev mus qhia ntawv rau cov zej zog hais txog kev mus los kom nyab xeeb rau txhua hom kev mus los. Kev nyab xeeb yog pib los ntawm peb txhua tus.
Cov Feem Hauj Lwm:
